Lavuratori da scriver da l’ULR: «Exercices de style»

I dat plirs stils da scriver…

Ils 8 e 9 da zercladur en 13 persunas sa participadas al lavuratori da scriver da quest onn. L‘ atelier da scriver creativ è stà sut il tema «Exercices de style». Il lavuratori ha giu lieu a Casti. Referent principal è stà il scriptur ladin Dumenic Andry. Benedetto Vigne ha inspirà ils participants e las participantas da scriver lur agens texts en differents stils. Ina schelta dals texts vegn publitgada en la Litteratura 38.

Motto dals DDL 2019: Tranter Lingias

lls 28avels Dis da litteratura han il motto tranter lingias ed èn dals 2 fin ils 4 da november 2018 a Domat.

Els sa deditgeschan al pled u meglier ditg al spazi tranter ils pleds. Tge è tranter (las) lingias? Tge capita en quest lieu? Igl è il spazi nua che l’autura e l’autur protegian la tensiun, la melodia, il messadi zuppà, forsa era critica e tabus.

La litteratura viva da tals spazis. Els èn in segund plaun da communicaziun. La lectura ed il lectur vegnan animads da reflectar, d’interpretar e d’udir trantertuns. Per exempel cun agid da metafras, allusiuns ed ironia. È l’essenza, la vaira muntada forsa be da chattar tranter lingias?

 

Dapli.

Prelecziuns al Openair Munt Sogn Gieri a Vuorz

Bainbaud puspè interessantas prelecziuns e referats al Openair Munt Sogn Gieri a Vuorz en Surselva:

 

Venderdi, 24-8-18
Ursula Brunold-Bigler | referat
strias, ditgas e legendas

Hubert Giger | prelecziun
«La stria da Dentervals / Die Hexe von Dentervals»

tranteren raquenta Sidonia Kasper legendas or dal temp da strias

 

sonda, 25-8-18
Leontina Lergier-Caviezel | prelecziun
«Davos ils mugrins»

Leta Semadeni | prelecziun
«Tamangur»

 

Dapli.

Lavuratori da scriver da l’ULR: „ditgas – ier, oz e damaun“

Ils 19 e 20 da matg da quest onn organisescha l’Uniun per la Litteratura Rumantscha ULR in atelier da scriver creativ sut il tema «ditgas – ier, oz e damaun». El ha lieu en Casa d’Angel (Fundaziun da cultura Lumnezia) e sa cumpona da dus referats la sonda e dus ateliers da scriver, l’emprim la sonda suentermezdi e l’auter la dumengia damaun.

Ils dus referents èn enconuschents scripturs rumantschs: Romana Ganzoni e Leo Tuor. La Ladina Romana Ganzoni vegn a discurrer davart la maniera da laschar nascher in’istorgia or dad ina fotografia u in maletg. Il Sursilvan Leo Tuor vegn a preschentar co scriver in raquint fantastic curt or dad istorgias tradiziunalas u simplamain or da si’atgna fantasia.

Ils dus ateliers sa sviluppan enturn duas tematicas: „ditga tar text“ e „fotografia tar text“ e vegnan animads da Viola Pfeiffer resp. Benedetto Vigne.

Las persunas che partecipeschan a quest lavuratori han era la pussaivladad da surlavurar lur texts suenter il lavuratori e dad inoltrar els per publitgar en ina secziun da la Litteratura.

Ils participants han la pussaivladad da pernottar en Casa Giudem Vitg a Cumbel (l’ULR organisescha la pernottaziun). Il pretsch dal lavuratori per participant è da 50.- francs cun pernottaziun u 30.- francs senza pernottaziun. El cumprenda referats, ateliers, tschavera e marenda.

Las inscripziuns èn avertas tochen ils 31 da mars. Scrivi simplamain a litteratura@gmx.ch u a

Viola Pfeiffer – Schaffhauserstrasse 157 – 8057 Turitg – 079 723 04 28.

Radunanza generala 2018

La radunanza generala da la ULR ha lieu ils 28 d’avrigl 2018 da las 10.15 en Chasa Rumantscha a Cuira (Via da la Plessur 7).

Il rapport annual dal onn passà chatt’ins qua:

rg2017_protocol

Suentermezdi datti in referat da la scientista da cultura e litteratura Elisabeth Bronfen. L’entrada e libra, ed era betg-commembers èn bainvegni.