litteratura 30

In experiment

Las paginas alvas da la Litteratura 30 duessan animar da scriver. Quai è spazi per litteratura! Dentant betg mo: la Litteratura 30 duai esser ina plattafurma per differentas modas da vegnir a pled, per differentas modas da s’exprimer. Mintgin e mintgina po dar giu sia atgna Litteratura 30 fin mez avust 2010 tar l’Uniun per la Litteratura Rumantscha. Las Litteraturas che turnan vegnan expostas e pon era vegnir preschentadas dals auturs e da las auturas persunalmain als Dis da litteratura 2010 a Domat.

Litteratura 30, la racolta: Las paginas alvas da la Litteratura 30 n’èn betg pli alvas. Almain betg pli tar quels e quellas che las han emplenidas. Las paginas cuntegnan ussa poesias, collaschas, dumondas, skizzas, gieus, retgams, istorgias lungas e pli curtas, dissegns, notizias, diaris.

Per dar in’invista en ils resultats da quest experiment ha l’Uniun per la Litteratura Rumantscha fatg in’ediziun limitada cun extracts da las paginas inoltradas (selecziun e grafica: Carlo Clopath e Julie Richoz).

L’ediziun è exausta, qua pudais telechargiar il pdf da questa ediziun.

litteratura 29

Generaziuns

24 differentas auturas ed auturs rumantschs (tranter auters: Arnold Spescha, Claudio Spescha, Rita Uffer, Pia Valär, Eva Riedi, Mevina Puorger, Oscar Peer, Benedetto Vigne) han contribuì texts per la “Litteratura 29”. Vus chattais en l’emprima part lur texts tar il tema “generaziuns”.

Ils “dialogs litterars” furman la segunda part da la “Litteratura 29”. Mintgamai duas auturas ed auturs han scrit in a l’auter, en furma litterara u en furma da commentaris en mintga cas en ina furma ch’els han tschernì sez e che permetta uss al lectur ed a la lectura da survegnir in’invista en in dialog tranter duas persunas.

La terza part da la “Litteratura 29” è ina collecziun da recensiuns da cudeschs rumantschs e texts actuals.