Scriver per la Litteratura 38

scriver per la Litteratura 38

 

«Wie wärs mit etwas Meer?»

il mar – la mar

 

Cun quest titel da lavur As vulain nus intimar da scriver per la Litteratura 38. Quest onn è la Litteratura pia deditgada a la mar. U al mar – tut tenor idiom.

Mar sco lieu da projecziun …

per la profunditad e la vastezza, per spazi e temp, per il blau ed il bletsch, per il patgific e per il turbulent, per l’encreschadetgna, la brama, per il lontan, aventura ed exotica, dischorientaziun, privel, la mar cun las istorgias e figuras mitologicas, la mar sco origin dal mund …

Ma era la mar concreta?

Sco sistem ecologic, sco element da vita e mort, «la mar» sco lieu da vacanzas e da fugia, la mar auta, la mar bassa, il lieu d’existenza per turistichers e pestgadurs, per peschs e conchiglias, il lieu da naschientscha da noss fischstäblis …

E la finala la mar sco destinaziun da noss flums e dutgs ed aualins che culan giu da las muntognas … Gea, co statti cun la relaziun da (nus) muntagnards e la mar? Flurin Spescha, dal qual deriva il titel cità sura, aveva ina giada remartgà ch’il rumantsch saja l’unica lingua neolatina che na cunfinia betg a la mar.

Pia: Tge relaziuns has Ti cun la mar?

 

Nus ans legrain sin Voss texts (prosa u poesia, essais, dramas u raquints fantastics) ed als spetgain enfin ils 16 da zercladur 2019; als tramettai a Benedetto Vigne (bevi@sunrise.ch), a Flavia Hobi (flavia.hobi@bluewin.ch) u a Silvana Derungs (silvana.derungs@gmx.ch).

 

cordials salids e buna inspiraziun

Benedetto, Flavia e Silvana

 

PS: Bainvesids en la Litteratura èn sco adina er Voss texts litterars «libers», ordaifer il tema principal.

 

Appel da scriver_Litteratura 38

 

Appel da scriver per la Litteratura 37

«Il med è il messadi» u «la moda da dir»

Cun quest titel da lavur as vulain nus intimar da scriver per la Litteratura 37. Quest onn sa deditgescha la Litteratura als differents meds da scriver, resp. a las differentas modas, furmas e pussaivladads da producir litteratura (ed auters texts). In punct da partenza è qua la tesa «the medium is the message» dal filosof Marshall McLuhan.

Ch’il computer è daventà med per scriver, quai è gea normal. Schegea che intgins scrivan forsa anc a maun lur texts litterars. Pertge? Tge influenza ha quai sin il text, sin il cuntegn?
E tge èsi cun auters meds: sms, whatsapp, blogs, brevs, diaris, litteratura auditiva etc. Co funcziuna la litteratura sur e cun quests chanals?

Tge è pli impurtant: la moda da dir/scriver u il cuntegn dal messadi? E tge è insumma in messadi?

I faschess plaschair da leger da vossas experientschas e da voss experiments. Quai pon esser essais, reflexiuns davart meds da massa en general, lur svilup e midadas (da la gasetta al telefon, dal radio a la televisiun e vinavant). Quai pon dentant er esser expectoraziuns davart vossas disas da leger e scriver cun differents meds. Ed en la Litteratura dastgan er esser texts litterars per examinar la tesa suranumnada: Co fissi p.ex. cun in exercizi da transmetter in medem messadi en differentas furmas, saja sco essai, sco poesia u sco text twittrà cun 280 segns? Forsa pari a vus absurd ed anacronistic da – gist cun quest tema – reflectar e scriver per ina Litteratura, scritta e stampada e liada sin palpiri. Era quai pudais tematisar.

Bainvesids en la Litteratura èn sco adina er voss texts litterars libers dal tema principal. Nus ans legrain sin voss texts ed als spetgain enfin ils 17 da zercladur; als tramettai a

Benedetto Vigne (bevi@sunrise.ch) u Silvana Derungs (silvana.derungs@gmx.ch).

Cordials salids

Benedetto e Silvana

litteratura 36

Litteratura 36 – Biografias

Questa ediziun nr. 36, sut la redacziun da Silvana Derungs e Benedetto Vigne, sa deditgescha a texts biografics en divers senns, p.ex. datti la biografia dal sutlitinent Dentant, naschì pervi d’in sbagl da comma ed ina scena cun il Josef da café en l’ustaria Tödi. La meglra matematicra dal mund revelescha la spira vardad da sia vita ed i vegn raquintà, co ch’il militar svizzer fa amaturs da latg chaura. Vitiers datti era texts libers dal tema principal, sco p.ex. ils texts dal Premi Term Bel 2016, l’omagi per la surdada dal Premi SRG.R als Dis da litteratura, ina regurdientscha a l’autur defunct Dumeni Capeder. Auturas ed auturs dal numer 36 èn tranter auter Romana Ganzoni, Fadrina Hofmann, Iso Camartin, Hubert Giger, Göri Klainguti, Claudio Spescha, Walter Rosselli ed auters. La revista è illustrada cun maletgs da Jaromir Kreiliger.

 

Ins po empustar la Litteratura 36 qua.

 

Biografias
Litteratura 36
Prosa, lirica, essais
idioms, RG, tudestg
october 2017
160 paginas, illustrà
frs. 20.00

 

litteratura 35

la Litteratura, deditgada a la litteratura da la glieud giuvna, quai vul dir: la redacziun ha fatg in appel a persunas giuvnas da maximal 35 onns da scriver. Quellas persunas survegnì la pussaivladad da lavurar vi da lur texts cun inA menturA. Ils suandants tandems dad autura e menturA sa chattan en la Litteratura 35:

Carin Caduff cun Eva Riedi: La costa
Dominique Dosch cun Annetta Ganzoni: Embrasser
Flavia Hobi cun Rico F. Valär: Viver attracziuns
Fadrina Hofmann cun Romana Ganzoni: L’isla
Annatina Nay cun Rita Cathomas Bearth: Enzacu forsa bein
Natalia Salzgeber cun Sidonia Klainguti: Il tè es gnü fraid

Las illustraziuns ha procurà Selina Puorger.

Era auturas ed auturs fitg giuvens chattan in plaz en la Litteratura 35, cun divers texts da las concurrenzas da scriver Plema d’aur/Pledpierla e da Linguissimo. Ulteriurs texts (regurdientschas, resuns, recensiuns) derivan da Benedetto Vigne, Arnold Spescha, Giusep Capaul, Anita Gordon, Leo Tuor e.a.

Empustar pudais la Litteratura 35 qua sur la butia da desertina.

litteratura 34

Real – irreal – surreal

N’exista la Svizra betg, perquai ch’ella n’ha nagin retg? L’Engalterra pudess  esser surreala – ma tge pajais fissan lura sut-reals? Quai sa dumonda Walter Rosselli en ses text davart pajais reals ed irreals. Iso Camartin sa dumonda,
schebain la musica saja in art che supportia elements surreals e Tina Planta-Vital s’inscuntra en sia poesia cun ils antenats che passan sper ella vi.

En la retscha Litteratura cumpara dapi passa 30 onns regularmain in tom cun novs texts rumantschs. Per questa ediziun nr. 34, sut la redacziun da Uorschla Natalia Caprez Brülhart e Hubert Giger, è vegnì tschernì il tema «real – irreal – surreal». Cun texts da Fadrina Hofmann, Göri Klainguti, Erica Lozza Pasquier, Paulin Nuotclà, Angelika Overath, Simon Perathoner (ladin dolomitan), Mevina Puorger Pestalozzi, Anna Ratti, Fadri Rauch, Eva Riedi Collen, Arnold Spescha, Benedetto Vigne e.a.

Empustar pudais la Litteratura 34 qua sur la pagina da casanovashop.

 

litteratura 33

«GEA E NA»- la Litteratura 33

La redacziun da la Litteratura è ida a la tschertga dal dilemma tranter il „gea“ ed il „na“. La Litteratura 33 è ussa emplenida cun essais, poesias, istorgias, discurs, poesias, translaziuns, recensiuns, cun regurdanzas ad Oscar Peer ed era cun ils texts da „la pagina“ prelegids als Dis da litteratura 2013.  Contribuì a la Litteratura 33 han tranter auter Annemieke Buob, Maria Cadruvi, Silvio Camenisch, Fadrina Hofmann, Göri Klainguti, Angelika Overath, Chasper Pult, Mario Pult, Eva Riedi, Natalia Salzgeber, Leo Tuor, Laura Zangger e blers auter.

La Litteratura pudais Vus empustar qua sur la Chasa Editura Rumantscha.

litteratura 32

“Litteratura e purtrets”

La redacziun da la Litteratura è ida a la tschertga da la convivenza e la concurrenza tranter l’art da scriver e l’art figurativ. La Litteratura 32 è ussa emplenida cun essais, analisas, descripziuns, interpretaziuns, istorgias, discurs, poesias, illustraziuns, comics, translaziuns e bler auter.  Contribuì a la Litteratura 32 han tranter auter Dumenic Andry, Flurina Badel, Iso Camartin, Ludivina Candinas, Jacques Guidon, Laura Loretz, Oscar Peer, Rut Plouda, Mevina Puorger, Clà Riatsch e blers auters…

La Litteratura pudais Vus empustar qua sur la Chasa Editura Rumantscha.

Tar la producziun da la Litteratura èn displaschaivlamain capitads plirs sbagls. Tranter auter na cumparan ils texts da Clà Riatsch e Dumenic Andry en la dretga successiun. Il document cun quels dus texts en la successiun correcta e cun las annotaziuns correctas pudais vus telechargiar qua:

Litteratura 32_correctura_Riatsch_Andry

In document cun pliras remartgas da correctura pudais vus telechargiar qua: Litteratura 32_Errata

 

litteratura 31

„Litteratura e musica“  –  A la tschertga dad atmosferas

La redacziun da la Litteratura è ida a la tschertga dad atmosferas musicalas per crear atmosferas litteraras. Cun texts e poesias da Lothar Deplazes, Arnolds Spescha, Jon Nuotclà, Chatrina Josty, Oscar Peer, Steivan Lliun Könz, Angelika Overath, e.a.
Cun essais dad Iso Camartin, Cristian Collenberg, Sidonia Klainguti, Benedetto Vigne, Bettina Vital, e.a.
Intervistas cun Arno Camenisch e Pascal Gamboni, Leo Tuor, e.a.

La Litteratura pudais Vus empustar qua sur la Chasa Editura Rumatnscha.

litteratura 30

In experiment

Las paginas alvas da la Litteratura 30 duessan animar da scriver. Quai è spazi per litteratura! Dentant betg mo: la Litteratura 30 duai esser ina plattafurma per differentas modas da vegnir a pled, per differentas modas da s’exprimer. Mintgin e mintgina po dar giu sia atgna Litteratura 30 fin mez avust 2010 tar l’Uniun per la Litteratura Rumantscha. Las Litteraturas che turnan vegnan expostas e pon era vegnir preschentadas dals auturs e da las auturas persunalmain als Dis da litteratura 2010 a Domat.

Litteratura 30, la racolta: Las paginas alvas da la Litteratura 30 n’èn betg pli alvas. Almain betg pli tar quels e quellas che las han emplenidas. Las paginas cuntegnan ussa poesias, collaschas, dumondas, skizzas, gieus, retgams, istorgias lungas e pli curtas, dissegns, notizias, diaris.

Per dar in’invista en ils resultats da quest experiment ha l’Uniun per la Litteratura Rumantscha fatg in’ediziun limitada cun extracts da las paginas inoltradas (selecziun e grafica: Carlo Clopath e Julie Richoz).

L’ediziun è exausta, qua pudais telechargiar il pdf da questa ediziun.