Punct dubel 2018

Ensemen cun la CER ha l’ULR organisà l’onn passà dus inscunters litterars «punct dubel»: ils 17 da mars han Attilo Bivetti e Leontina Lergier-Caviezel prelegì da lur texts per part anc betg publitgads en Chesin Manella a Schlarigna e han discutà cun la moderatura Anita Capaul davart lur scriver.

Il segund punct dubel ha gì lieu ils 9 da settember en la Chasa Rumantscha a Cuira. Claudio Spescha ha moderà il discurs e la prelecziun da Walter Rosselli e Claire Hauser-Pult che stevan sut in tema che ha chattà adina dapli attenziun ils davos onns: la translaziun.

Omadus puncts dubels han chattà buna accoglientscha ed in allegraivel dumber da visiturs. Nus engraziain ad auturs ed auturas, moderaturs e moderaturas ed visitaders e visitadras per la bella experientscha!

0