Clom da l’ULR per in votum encunter No-Billag

Charas auturas rumantschas, chars auturs rumantschs
L’ULR As supplitgescha dad exprimer in votum cunter l’iniziativa No-Billag avant Vossas proximas prelecziuns publicas en il Grischun ed en la Bassa tochen ils 4 da mars.

 

Ils 4 da mars 2018 votescha il pievel svizzer sur da l’iniziativa No-Billag. L’iniziativa vul abolir las taxas da radio e televisiun sin il nivel constituziunal. I fiss scumandà a la Confederaziun da sustegnair finanzialmain medias publicas en Svizra. Quai munta il medem mument l’aboliziun da la finanziaziun publica dals emetturs da la SRG SSR e dals emetturs locals e regiunals privats.

Sche l’iniziativa vegn approvada, avess quai consequenzas radicalas per SRF, RTR, RTS ed RSI. D’in di a l’auter vegnissan las glischs stizzadas tar ellas.

Las consequenzas vegnissan surtut a pertutgar la Rumantschia, la quala perdess cun RTR ina plattafurma essenziala per la la preschientscha, la derasaziun ed il mantegniment da la lingua e cultura rumantscha. La diffusiun e la promoziun da musica e litteratura indigena giess a perder, sco era ina purschida mediala independenta che permetta da furmar l’atgna opiniun cun agid da l’atgna lingua. Senza sustegn public è in program da radio u televisiun per rumantsch istorgia.

Er blers emetturs regiunals tudestgs, sco p.ex. Radio e TV Südostschweiz, disparissan. Il privel fiss grond che radio e televisiun en Svizra vegnissan en il futur be pli manadas e dominadas da firmas u persunas finanzialmain potentas, interessadas be pli ad emissiuns rentablas e politicamain tendenziusas.

In extremis munta l’iniziativa No-Billag la frida mortala per la lingua e cultura Rumantscha!

Per quests motivs as engaschain nus per in NA encunter questa iniziativa destructiva.

Cordials salids

La suprastanza

ULR Uniun per la Litteratura Rumantscha

0