Punct dubel al giubileum da 100 onns LR

Il punct dubel è hosp al giubileum da 100 onns da la Lia Rumantscha a Zuoz! Da las 15.45 – 16.30 sin Tribuna gronda!

 

Dominique Dosch e Leo Tuor prelegian divers da lur texts e discutan davart il scriver. L’occurrenza vegn moderada dad Anita Capaul. Il format “punct dubel” è ina collavuraziun tranter L’Uniun per litteratura rumantscha e la Chasa Editura Rumantscha cun l’intenziun da reunir dus scripturs da duas differentas regiuns.

Uras: 15.45 – 16.30
Lieu: Tribuna gronda
Lingua: Rumantsch
Partenarias: Uniun per la litteratura rumantscha, Chasa Editura Rumantscha

Dapli infurmaziuns tar il di tematic da litteratura al giubileum da 100 onns qua.

La Uniun per la Litteratura Rumantscha ha ina nova presidenta

Manuela Balett, ch’è creschida si a Breil, è vegnida elegida ils 4 da matg 2019 durant la radunanza generala da l’Uniun per litteratura rumantscha unanimamain sco nova presidenta. Ella succeda a Viola Pfeiffer, ch’è stà var trais onns en uffizi e sa deditgescha en il futur pli ferm a sia dissertaziun sco er al scriver. Manuela Balett ha 33 onns e lavura tar la fundaziun filantropica Leopold Bachman.

Sco nova presidenta vul ella s’engaschar per auturs ed interessads a la litteratura e vul empruvar da nizzegiar meglier sinergias cun autras uniuns da lingua, per exempel quai che pertutga il sustegn finanzial da projects.

Vinavant è Annatina Nay da Trun vegnida elegida nov en la suprastanza. Er vegnids affirmads en suprastanza da l’ULR èn Benedetto Vigne, Walter Roselli e Flavia Hobi.

 

Contribuziun da Sabrina Bundi tar radio rumantsch RTR.

Proxima Radunanza Generala: ils 4 da matg 2019

La radunanza generala da la ULR ha lieu ils 4 da matg 2019 en il Stern a Cuira. Sco adina cumenza la radunanza da las 10.15. Suenter datti in gentar e suentermezdi in referat da Prof. Rico Valär. La prelecziun è averta per tuttAs interessadAs.

 

Il protocol da la radunanza generala 2018 pudais chargiar giu qua: ULR-rg2018_protocol.

Il rapport annual da la ULR pudais chargiar giu qua: ULR_rapport annual_2018.

Lavuratori da scriver da l’ULR: «Exercices de style»

  • Giosch Gianira gieva in bel di da stad a spass lung il lai da Lags.
  • Jau chamin gia dapi mes’ Il sulegl reflectescha en las undas dal lai. Mia chamischa è bletschentada.
  • Purtret: Las recreaziuns d’in famus bancar sursilvan.
  • Pass per pass / emblidond / il fracass / da quest mund …

 

I dat plirs stils da scriver…

Ils 8 e 9 da zercladur da quest onn, pia la sonda e dumengia da Tschuncaismas,  organisescha l’Uniun per la Litteratura Rumantscha ULR in atelier da scriver creativ sut il tema «Exercices de style». Il lavuratori ha lieu en il nov center cultural ANIM a Savognin e vegn enramà da divers referats introductivs. La sonda saira è previs in pitschen intervent public (prelecziuns, musica, però betg cun cuntegns da l’atelier!)

Referent principal è il scriptur ladin Dumenic Andry. Dumenic experimentescha en ses agen scriver gugent cun stils e po uschia dar in bun e fritgaivel impuls da partenza. L’atelier da scriver vegn a sa basar sin texts gia existents; sa chapescha che participants e participantas pon proponer agens texts (da preferenza betg pli che mesa pagina).

Pussaivladad da pernottar datti en l’hotel Danilo a Savognin u tar ina persuna privata (l’ULR organisescha). Il pretsch dal lavuratori pro participant è 80.- francs cun pernottaziun en l’hotel u 40.- francs per ils auters. El cumpiglia referats, ateliers, tschavera e marenda.

Las inscripziuns èn avertas enfin ils 19 da matg.

Scrivi simplamain a info@litteraturarumantscha.ch u a Viola Pfeiffer – Schaffhauserstrasse 157, 8057 Turitg – 079 723 04 28.

 

Nus ans legrain sin ina massa inscripziuns!

Scriver per la Litteratura 38

scriver per la Litteratura 38

 

«Wie wärs mit etwas Meer?»

il mar – la mar

 

Cun quest titel da lavur As vulain nus intimar da scriver per la Litteratura 38. Quest onn è la Litteratura pia deditgada a la mar. U al mar – tut tenor idiom.

Mar sco lieu da projecziun …

per la profunditad e la vastezza, per spazi e temp, per il blau ed il bletsch, per il patgific e per il turbulent, per l’encreschadetgna, la brama, per il lontan, aventura ed exotica, dischorientaziun, privel, la mar cun las istorgias e figuras mitologicas, la mar sco origin dal mund …

Ma era la mar concreta?

Sco sistem ecologic, sco element da vita e mort, «la mar» sco lieu da vacanzas e da fugia, la mar auta, la mar bassa, il lieu d’existenza per turistichers e pestgadurs, per peschs e conchiglias, il lieu da naschientscha da noss fischstäblis …

E la finala la mar sco destinaziun da noss flums e dutgs ed aualins che culan giu da las muntognas … Gea, co statti cun la relaziun da (nus) muntagnards e la mar? Flurin Spescha, dal qual deriva il titel cità sura, aveva ina giada remartgà ch’il rumantsch saja l’unica lingua neolatina che na cunfinia betg a la mar.

Pia: Tge relaziuns has Ti cun la mar?

 

Nus ans legrain sin Voss texts (prosa u poesia, essais, dramas u raquints fantastics) ed als spetgain enfin ils 16 da zercladur 2019; als tramettai a Benedetto Vigne (bevi@sunrise.ch), a Flavia Hobi (flavia.hobi@bluewin.ch) u a Silvana Derungs (silvana.derungs@gmx.ch).

 

cordials salids e buna inspiraziun

Benedetto, Flavia e Silvana

 

PS: Bainvesids en la Litteratura èn sco adina er Voss texts litterars «libers», ordaifer il tema principal.

 

Appel da scriver_Litteratura 38

 

Linguissimo: per giuvens e giuvnas tranter 16 e 21 onns

La concurrenza linguistica che mussa la Svizra or d’ina nova perspectiva!

Cun la concurrenza plurilingua Linguissimo partas ti tes lieus preferids, emprendas d’enconuscher auters giuvenils da la Svizra e profiteschas da lur tips. Ti pos gudagnar ina fin d’emna en Svizra per ta participar al final e schizunt in viadi insanua en l’Europa!

Chavazzin per l’emprima runda 2019: Tranter da nus
Tema dal final 2019: La poesia
Annunzias fin : ils 31 da schaner 2019

Dapli infos qua.

Prelecziuns al Openair Munt Sogn Gieri a Vuorz

Bainbaud puspè interessantas prelecziuns e referats al Openair Munt Sogn Gieri a Vuorz en Surselva:

 

Venderdi, 24-8-18
Ursula Brunold-Bigler | referat
strias, ditgas e legendas

Hubert Giger | prelecziun
«La stria da Dentervals / Die Hexe von Dentervals»

tranteren raquenta Sidonia Kasper legendas or dal temp da strias

 

sonda, 25-8-18
Leontina Lergier-Caviezel | prelecziun
«Davos ils mugrins»

Leta Semadeni | prelecziun
«Tamangur»

 

Dapli.