«La poesia» – Lavuratori litterar al «Spiert avert» a Tschlin

spetgond la musa.
i passan mess d’amur e
pots da malaura.

Benedetto Vigne, Diari giapunais

 

«La poesia» – Lavuratori litterar al «Spiert avert» a Tschlin

La ULR (Uniun per la Litteratura Rumantscha) envida ad in lavuratori litterar che cuzza dal venderdi saira ils 10 da zercladur/gügn enfin dumengia ils 12 da zercladur/gügn 2022, en il center cultural «Spiert Avert» a Tschlin.

Tema dal lavuratori: «La poesia». Nus perscrutain vias da scriver e translatar poesia, sut guida ed animaziun dad Angelika Overath, tadlain referats da Flurina Badel, Renzo Caduff e Benedetto Vigne, ed intginas chanzuns da Roland Voegtli.

Pussaivladad da pernottaziun e tschaveras al «Spiert avert».

 

Custs
commemb. ULR e students / na commemb.
(entira fin d’emna, 2 pernottaziuns): 150.— / 200.—
(dus dis, ina pernottaziun): 100.— / 150.—
(in di, senza pernottaziun): 50.— / 100.—

 

Annunzias
P.pl. fin als 31 da matg 2022 a sequenta adressa:
bevi@smile.ch  ubain 078 714 36 51

Preavis: Radunanza generala da l’ULR 2022

La Radunanza Generala da la ULR ha lieu sonda ils 30 d’avrigl 2022 en il hotel Stern a Cuira (10.15 h). Suenter la radunanza ed il gentar comunaivel envida la ULR ad in referat da Monika Schärer, la moderatura partenta dal radio SRF2 Kultur. Invit uffizial e glista da tractandas suondan individualmain per posta.

Scriver per la Litteratura 41

APPEL DA LA REVISTA «LITTERATURA 41»

La Litteratura e «la poesia»

Charas auturas, chars auturs, chars poets e charas poetessas

«La poesia». Tge è quai? Nua inscuntr’jau la poesia? Cura ma surventscha la poesia? Sche insumma, u tutgais vus tar quella glieud che di: «La poesia? La poesia na ma di nagut.» Ma cura è in text ina poesia? Cura è insatge poesia?

Ed insumma: Tge poesias scrivais vus?

La Litteratura 41 sa deditgescha a «la poesia». Tramettai perquai vossas poesias, ma era vos texts davart la poesia a la redacziun: a Benedetto Vigne (bevi@sunrise.ch), a Flavia Hobi (flavia.hobi@bluewin.ch) ubain a Silvana Derungs (silvana.derungs@gmx.ch).

Termin: ils 10 da zercladur 2022 (fitg gugent pli baud, grazia).

Dal reminent: as deditgar al scriver poesias pudais vus a chaschun dad in lavuratori che l’ULR organisescha il zercladur a Tschlin. Detagls chattais Vus en l’annunzia publitgada sura en questa newsletter.

Nus ans legrain sin vossas poesias

Cordials salids da la redacziun da la Litteratura

Benedetto, Flavia e Silvana

 

Empustar la Litteratura 40

Litteratura 40 «Sin via»

«Nus mein sper la mar. … Maletgs dalla mar vaiu è schon viu. Ella Glücks Post.»

75 onns festivescha l’Uniun per la Litteratura Rumantscha (ULR) quest onn. Quest giubileum e l’ediziun nr. 40 da la «Litteratura», la publicaziun annuala da l’uniun, han motivà la redacziun da dar ina survista dal who is who litterar rumantsch. Ussa mainan 75 purtrets dad auturas ed auturs rumantschs tras la Litteratura 40, tut ils purtrets illustrads da Pia Valär ed intgins accumpagnads da texts, scrits aposta per il tema da l’ediziun actuala: «Sin via».

 

Veterans e novizas

L’ediziun cumpilescha purtrets da veterans litterars, ma era da persunas che han enchaminà la via litterara pir dacurt; ina dad ellas p.ex. Carin Caduff cun il citat introductiv. Daperas maina la Litteratura davent da Dumenic Andry, Carlo Beer, Rut Bernardi e Viola Cadruvi sur Dominique Caglia Dosch, Uolf Candrian, Fabiola Carigiet, Jürg Gautschi e Göri Klainguti fin tar Rut Plouda, Walter Rosselli, Leo Tuor e Jessica Zuan.

 

Da retrair tar desertina.ch ubain era tar la Lia Rumantscha. Vuls ti leger dapli? Emposta la Litteratura 40 tar: Benedetto Vigne per email – bevi@sunrise.ch.

 

SIN VIA – Litteratura 40
Prosa, lirica, essais, recensiuns, cronica
idioms, RG, october 2021, 208 paginas, illustrà, frs. 20.00. ISSN 1016-9458
Uniun per la Litteratura Rumantscha, Cuira

 

Ils 30avels Dis da litteratura 2021

Suenter in viadi detur han ils Dis da litteratura 2021 puspè lieu en sala Tircal a Domat: dals 5 enfin ils 7 da november 2021.

 

giud via

Nua via? Betg be nus essan sin via, mabain era la litteratura rumantscha: ella avra vias, enchamina straduns da bellezza e streglias stgiras, enconuscha vias pulainas e stat savens al spartavias. Adina puspè va ella giud via e sa metta cun gust sin ils fastizs dal nunenconuschent, da l’invisibel, da l’emblidà. Tge tschertga e scuvra ella giud via?

Pervia da la pandemia vegn desistì da la tschaina e dal program da sonda saira.

 

https://www.disdalitteratura.ch/

 

Davart la(s) fin(s) – la Litteratura 39

«In resun dil vargau. In gust amar. Da quei ch’ei piars. Da quei ch’ei ussa lunsch naven. Nua ch’il mund ei divers. Divers da quel da cheu.»

Divers èn era ils numerus texts da las auturas e dals auturs che fan part da la Litteratura 39, la revista annuala da la ULR (l’Uniun per la Litteratura Rumantscha), cumparida dacurt. Il text da Claudio Spescha, dal qual deriva il citat d’entrada, è la memoria ad in’amia spartida giuvna. Alice Bertogg raquinta davart la davosa chanzun dal Chor mischedau Danis-Tavanasa, schend che «sia finiziun cun ‚siu‘ chor ei stada aschia perfetga ch’ella cuoza a semper.» Fadrina Hofmann observa in funeral or da la vista dad in ravarenda, in chavafossas, ina vaiva ed in’Emilia che manegia «Il plü jent vegna als funerals da politikers». Göri Klainguti resumescha las fins magari contestadas da ses texts cun il proverbi «La via es il böt». Sper tut quests numnads chatt’ins er anc texts da Viola Cadruvi, Iso Camartin, Maria Cadruvi, Leo Tuor, Gianna Olinda Cadonau – curt, in grond entaup da plimas veteranas e novizas da la Rumantschia, enramà d’ina briglianta cuverta melna. Ils texts cuntegnan reflexiuns davart la fin da noss dis, la fin d’in’amur, la fin dal rumantsch, la fin d’in’istorgia, davart ulteriuras sorts da fins, ma er davart cumenzaments. Tge è pli grev, finir u cumenzar?

Sper il tema principal cuntegna la Litteratura 39 era regurdientschas da trapassads u resuns da cudeschs cumparids en il decurs da l’onn. Illustrada è quest’ediziun cun ina selecziun da fotografias ord la collecziun da Martin Cantieni.

FIN – Litteratura 39; 154 paginas, illustrà; frs. 20.00. Da retrair tar desertina.ch ubain era tar la Lia Rumantscha. Empustar la Litteratura 39 tar: Benedetto Vigne per email – bevi@sunrise.ch.

 

30avels Dis da Litteratura spustads!

Causa la situaziun coronarica ha il comité dals Dis da Litteratura decidì da spustar l’ediziun giubilara sin l’onn 2021; ils 30avels Dis da Litteratura han damai lieu dals 5 als 7 da november 2021, sco adina en la halla Tircal a Domat. Unicamain la concurrenza Premi Term Bel vegn realisada gia quest onn, en furma digitala. Dapli infos suondan.