Annullaziun da la Radunanza Generala spustada da l’ULR

La suprastanza da l’Uniun per la Litteratura Rumantscha ha decidì dad annullar la Radunanza Generala spustada a ses temp sin ils 3 d’october 2020. Motiv è la situaziun coronica anc adina detg acuta. Perencunter ha la suprastanza organisà ina radunanza electronica-digitala via newsletter per laschar confermar tras in questiunari las fatschentas usitadas da l’onn (protocol, rendaquint etc.), sinaquai che la suprastanza possia survegnir descharscha. (Entaifer las mesiras federalas cunter covid-19 vegn quella alternativa electronica da la Radunanza Generala explicit consentida). La proxima Radunanza Generala regulara duai avair lieu ils 17 d’avrigl 2021 a Cuira.

0

30avels Dis da Litteratura spustads!

Causa la situaziun coronarica ha il comité dals Dis da Litteratura decidì da spustar l’ediziun giubilara sin l’onn 2021; ils 30avels Dis da Litteratura han damai lieu dals 5 als 7 da november 2021, sco adina en la halla Tircal a Domat. Unicamain la concurrenza Premi Term Bel vegn realisada gia quest onn, en furma digitala. Dapli infos suondan.

0

Radunanza Generala da l’ULR vegn spustada

La Radunanza Generala da l’ULR ha lieu da nov ils 3 d’october 2020.

Pervia da la situaziun d’emergenza causa dal coronavirus n’ha la Radunanza Generala da l’ULR displaschaivlamain betg gì lieu ils 25 d’avrigl. Sco nov datum è tschernì ils 3 d’october 2020 a Cuira en il Hotel Stern. Detagls ed invitaziun suondan.

Amiaivels salids: Manuela Balett (presidenta), Benedetto Vigne, Walter Rosselli, Flavia Hobi ed Annatina Nay

Nus infurmain era sin Facebook davart l’ULR.

0

Scriver per la Litteratura 39

La Litteratura fa LA FIN.

Tar ils cudeschs discurr’ins adina dal cumenzament: Quant impurtanta che l’emprima frasa saja. Quant impurtant ch’il cumenzament saja per ch’il cudesch ans tschiffia.

Però: Co statti cun la fin? Quant impurtanta è quella per in cudesch? Forsa gist uschè impurtanta, pertge ils ultims pleds pon anc lavagar in bun cudesch. Quai èn ils pleds, cun ils quals in cudesch ans lascha puspè ir. Ils pleds relevants per l’ultima storta, l’ultim gust, l’ultim’impressiun. Sch’ins arriva insumma fin a la fin …

Perquai ans deditgain nus en la Litteratura 39 a LA FIN. Betg mo a la fin dals cudeschs. Quai èn fins da luxus, la finala. Autras fins da noss dis èn pli virulentas. Pensain a la fin da las resursas natiralas sco il petroli u l’aua da baiver. A la fin dals guauds tropics e diversas spezias da flora e fauna. Quant ditg vai anc enFin la Terza Guerra mundiala? Tge capita suenter la fin da l’umanitad? Però vegni gea pretendì che mintga fin saja er in’entschatta per insatge nov. (Ma tgi di che quel «nov» saja lura meglier?)

La Litteratura 39 na tschertga dentant betg mo texts da gener apocaliptic. Fins per scriver surlonder datti anc autras. Ch’i saja lura davart la fin da noss dis, ils cunfins da l’univers, la fin dad in’amur, ils cunfins e la fin dal rumantsch, la fin da nossa pazienza, la fin da las reservas da l’AVS, davart il leger a fin, il scriver a fin, etc.: Nus essan persvadids che vus vegnias da transfurmar era quel tema en furma litterara.

Cura E forsa che la dumonda cardinala è: Tge è pli grev – cumenzar u finir?

Nus sperain che voss texts chattian ina fin. Nus prendain texts fictivs, istorgias curtas u lungas senza fin, essais u poesias. Sco adina han era texts libers dal tema principal plazza en la Litteratura. La FIN da redacziun è ils 31 da matg 2020.

Tramettai voss texts a Benedetto Vigne, bevi@sunrise.ch, a Flavia Hobi flavia.hobi@bluewin.ch ubain a Silvana Derungs silvana.derungs@gmx.ch. Nus ans legrain infinitamain.

Cordials salids da la redacziun da la Litteratura

Benedetto, Flavia e Silvana

0

Scriver per la Litteratura 38

scriver per la Litteratura 38

 

«Wie wärs mit etwas Meer?»

il mar – la mar

 

Cun quest titel da lavur As vulain nus intimar da scriver per la Litteratura 38. Quest onn è la Litteratura pia deditgada a la mar. U al mar – tut tenor idiom.

Mar sco lieu da projecziun …

per la profunditad e la vastezza, per spazi e temp, per il blau ed il bletsch, per il patgific e per il turbulent, per l’encreschadetgna, la brama, per il lontan, aventura ed exotica, dischorientaziun, privel, la mar cun las istorgias e figuras mitologicas, la mar sco origin dal mund …

Ma era la mar concreta?

Sco sistem ecologic, sco element da vita e mort, «la mar» sco lieu da vacanzas e da fugia, la mar auta, la mar bassa, il lieu d’existenza per turistichers e pestgadurs, per peschs e conchiglias, il lieu da naschientscha da noss fischstäblis …

E la finala la mar sco destinaziun da noss flums e dutgs ed aualins che culan giu da las muntognas … Gea, co statti cun la relaziun da (nus) muntagnards e la mar? Flurin Spescha, dal qual deriva il titel cità sura, aveva ina giada remartgà ch’il rumantsch saja l’unica lingua neolatina che na cunfinia betg a la mar.

Pia: Tge relaziuns has Ti cun la mar?

 

Nus ans legrain sin Voss texts (prosa u poesia, essais, dramas u raquints fantastics) ed als spetgain enfin ils 16 da zercladur 2019; als tramettai a Benedetto Vigne (bevi@sunrise.ch), a Flavia Hobi (flavia.hobi@bluewin.ch) u a Silvana Derungs (silvana.derungs@gmx.ch).

 

cordials salids e buna inspiraziun

Benedetto, Flavia e Silvana

 

PS: Bainvesids en la Litteratura èn sco adina er Voss texts litterars «libers», ordaifer il tema principal.

 

Appel da scriver_Litteratura 38

 

0

Jull: scriver litterar

Der Bildungsgang Literarisches Schreiben wird in der bewährten Form und mit denselben Dozierenden (Barbara Geiser, Rolf Hermann, Viola Rohner und Ruth Schweikert) neu an der Volkshochschule Zürich in Kooperation mit dem Jungen Literaturlabor Zürich (JULL) angeboten. Für uns ist dieser Neuanfang ein grosses Glück – nicht zuletzt auch wegen der wunderbar atmosphärischen Räume an der Bärengasse 22, in denen der Bildungsgang, der sich nun ‚Lehrgang Literarisches Schreiben VHSZH_JULL‘ nennt, zukünftig stattfinden kann.
0

Linguissimo: per giuvens e giuvnas tranter 16 e 21 onns

La concurrenza linguistica che mussa la Svizra or d’ina nova perspectiva!

Cun la concurrenza plurilingua Linguissimo partas ti tes lieus preferids, emprendas d’enconuscher auters giuvenils da la Svizra e profiteschas da lur tips. Ti pos gudagnar ina fin d’emna en Svizra per ta participar al final e schizunt in viadi insanua en l’Europa!

Chavazzin per l’emprima runda 2019: Tranter da nus
Tema dal final 2019: La poesia
Annunzias fin : ils 31 da schaner 2019

Dapli infos qua.

0