Appel da scriver per la Litteratura 37

«Il med è il messadi» u «la moda da dir»

Cun quest titel da lavur as vulain nus intimar da scriver per la Litteratura 37. Quest onn sa deditgescha la Litteratura als differents meds da scriver, resp. a las differentas modas, furmas e pussaivladads da producir litteratura (ed auters texts). In punct da partenza è qua la tesa «the medium is the message» dal filosof Marshall McLuhan.

Ch’il computer è daventà med per scriver, quai è gea normal. Schegea che intgins scrivan forsa anc a maun lur texts litterars. Pertge? Tge influenza ha quai sin il text, sin il cuntegn?
E tge èsi cun auters meds: sms, whatsapp, blogs, brevs, diaris, litteratura auditiva etc. Co funcziuna la litteratura sur e cun quests chanals?

Tge è pli impurtant: la moda da dir/scriver u il cuntegn dal messadi? E tge è insumma in messadi?

I faschess plaschair da leger da vossas experientschas e da voss experiments. Quai pon esser essais, reflexiuns davart meds da massa en general, lur svilup e midadas (da la gasetta al telefon, dal radio a la televisiun e vinavant). Quai pon dentant er esser expectoraziuns davart vossas disas da leger e scriver cun differents meds. Ed en la Litteratura dastgan er esser texts litterars per examinar la tesa suranumnada: Co fissi p.ex. cun in exercizi da transmetter in medem messadi en differentas furmas, saja sco essai, sco poesia u sco text twittrà cun 280 segns? Forsa pari a vus absurd ed anacronistic da – gist cun quest tema – reflectar e scriver per ina Litteratura, scritta e stampada e liada sin palpiri. Era quai pudais tematisar.

Bainvesids en la Litteratura èn sco adina er voss texts litterars libers dal tema principal. Nus ans legrain sin voss texts ed als spetgain enfin ils 17 da zercladur; als tramettai a

Benedetto Vigne (bevi@sunrise.ch) u Silvana Derungs (silvana.derungs@gmx.ch).

Cordials salids

Benedetto e Silvana

0